جس دل وچ عشق محمد دا ، اس دل وچ نور آجاندا اے
جدوں لئیے نال محمد دا ، محفل نوں سرور آجاندا اے
میں طُور دی عظمت مندا ہاں ، پر وکھری شان مدینے دی
جدوں ٹُرئیے شہر مدینے نوں ، ہر قدم تے طُور آجاندا اے
جنہوں مل جائے قربت سوہنے دی ، اوہ نیڑے رب دے ہو جاوے
جہڑا ہووے دور محمد توں ، اوہ رب توں دور آجاندا اے
جد سُنئیے قصہ کربل وچ ، سیّد تے ورھدے تیراں دا
حُب دار دی اکھ وچ ہنجوؤاں دا سیلاب ضرور آ جاندا اے
اوہدے حکم تے سورج مُڑدا اے ، چن ٹوٹے ہو کے جُڑدا اے
اوہدا حکم ہووے تے پتھراں نوں بولن دا شعور آ جاندا اے
جد ویکھاں اپنے عملاں نوں میں صائم ڈب ڈب جانا ہاں
جد ویکھاں تیری رحمت نوں ، جُرماں تے غرور آ جاندا اے
ﷺ
صائم چشتیؔ